اسلام آباد۔9مئی(اے پی پی):پاکستان تے امریکہ توانائی دے تحفظ اتے ماحول دوست تے قابل تجدید توانائی دے شعبیں اچ تعاون سانڳے روڈ میپ تیار کرݨ تے اتفاق کیتے ۔امریکہ اچ پاکستان دے سفارتخانے توں جاری بیان موجب وزیر مملکت پٹرولیم مصدق ملک یو ایس ٹریڈ اینڈ ڈویلپمنٹ ایجنسی (یو ایس ٹی ڈی اے) اچ انڈو پیسیفک دے ریجنل ڈائریکٹر ویریندا فائیک اتے یو ایس ٹی ڈی اے اچ انڈو پیسیفک ریجن دے کنٹری منیجر تنوی مدھوسودنن دے نال ملاقات اچ توانائی دے تحفظ کوں یقینی بݨاوݨ ، موسمیاتی تبدیلی اتے پاکستان تے ایندے سماجی و اقتصادی اثرات متعلق امور تے ڳالھ مہاڑ کیتی ۔ملاقات اچ فریقین سرکاری تے نجی شعبیں اچ ماحول دوست تے قابل تجدید توانائی دے شعبے اچ تعاون کیتے روڈ میپ تیار کرݨ تے وی اتفاق کیتے۔ ایں سلسلے اچ امریکہ فزیبلٹی اسٹڈیز کیتے مالی اتے تکنیکی مہارت ݙیسی۔ ملاقات اچ امریکی حکام پاکستان اچ گرین امونیا، گرین ہائیڈروجن اتے قابل تجدید ذرائع متعلق منصوبیں کوں اڳوں ودھاوݨ اچ دلچسپی ظاہر کیتی۔مصدق ملک آکھیے پاکستان امریکہ نال رل تے ترقی پذیر دنیا اچ صاف اتے ماحول دوست توانائی دے ودھارے کیتے کردار ادا کریسی ۔ مصدق ملک امریکی سرمایہ کاراں کوں پاکستان اچ توانائی دے شعبیں اچ امکانات دا جائزہ گھنݨ تے مشترکہ منصوبے شروع کرݨ کیتے پاکستان دے دورے دی دعوت ݙتی ۔
