اسلام آباد۔4اگست(اے پی پی) کل جماعتی حریت کانفرنس دے رہنماواں آکھیے 5 اگست اساں کیتے تجدید عہد دا ݙینھ اے جݙاں تئیں اساں کشمیر کوں بھارت دے ناجائز ، غیر قانونی اتے غیر اخلاقی قبضے توں آزاد نی کروا گھندے تحریک آزادی جاری رہسی ، اقوام متحدہ، عالمی برادری ، او آئی سی ، یورپی یونین ، انسانی حقوق دیاں تنظیماں توں اپیل کریندوں او ریاست جموں وکشمیر دے ایں مسلمہ حق کوں ݙیواوݨ سانڳے آپݨا کردار نبھاون تے ریاست جموں وکشمیر اچ انسانی حقوق دی سنگین خلاف ورزیاں بند کراون تے ریاست اچ تے انہاں کوں آپݨا حق ݙیواوݨ سنڳے آپݨا کردار نبھاون ۔ یوم استحصال تے اے پی پی نال خصوصی ڳالھ مہاڑ اچ حریت رہنماواں غلام محمد صفی ،سید یوسف نسیم ایڈوکیٹ پرویز شاہ آکھیے بھارت ھک سازش دے بعد انھاں سارے معاہدیں دی خلاف ورزی کریندے کشمیرتے غاصبانہ قبضہ کرڳھدا تے ول آئینی دہشتگردی کریندے 5 اگست 2019 کوں کشمیر دی خصوصی حیثیت دی حامل دفعات کوں ختم کرݙتے۔ حریت کانفرنس کشمیر شاخ دے کنونئیر غلام محمد صفی آکھیے بنیادی طور تے ہندوستان پہلے ݙینھ توں ہی جموں وکشمیر تے اپݨے غاصبانہ قبضے کوں جائز قرار ݙیوݨ سانڳے کوششاں کریندا رہیے ایں سانڳے بھارت 5 اگست2019 کوں اے کھیݙ کھیݙیے جو یکطرفہ طور تے جموں وکشمیر کوں اپݨا حصہ بݨاوݨ دی مذموم کوشش کریندے بھارت دے آئین اچ کشمیر دی خصوصی حیثیت دے حوالے نال شامل دفعات کوں ختم کرݙتا ڳئے ایندے توں پہلے 1957 اچ آئین ساز اسمبلی دے ذریعے کشمیر دے ہندوستان نال الحاق دا ڈرامہ رچایا ڳیا تاں سلامتی کونسل ایں حوالے نال قرارداد منظور کیتی جیں پاروں بھارت دی چال ناکام تھئی، تاں جو اوں 5 اگست 2019 کوں اینکوں چپ کرتے کشمیر دی خصوصی حیثیت ختم کرݙتی ، اے ݙینھ ہر سال سرکاری سطح تے یوم استحصال دے طور تے منایا ویندے جتھاں پوری دنیا اچ ہر فورم تے ایں ظلم دے خلاف آواز چاتی ویندی پئی اے ۔ حریت کانفرنس آزاد کشمیر شاخ دے سیکرٹری جنرل ایڈوکیٹ پرویز شاہ آکھیے 5 اگست 2019 کوں بھارت اقوام متحدہ دی سلامتی کونسل دی قرارداداں سودھے سارے عالمی قوانین اتے اقوام متحدہ دے چارٹر دی خلاف ورزی کریندے مقبوضہ جموں وکشمیر دی خصوصی حیثیت ختم کرݙتی ، کشمیر کوں اے خصوصی حیثیت بھارت دے آئین دی تشکیل دے موقع تے اقوام متحدہ دی قرارداداں دے تحت اینکوں متنازعہ تصور کریندے ݙتی ڳئی ہئی ایں حوالے نال اوں ویلھے دی کشمیری نام نہاد قیادت اتے حکومت ہندوستان وچال معاہدہ تھیا جیں دے بعد 35 اے شامل کیتا ڳیا ، کشمیر اچ ہندوستان دے خلاف تحریک شروع تھئی تاں بھارت کوں احساس تھئے جو کشمیری ہندوستان نال نی رہݨ چاہندے ایں ݙر پاروں ہندوستان 35 اے اتے 370 دی دفعات ختم کیتن جیں دے بعد غیر کشمیریاں کوں 43 لکھ سٹیٹ سبجیکٹ جاری کیتے ڳئن تاں جو انہاں کوں کشمیر اچ آباد کیتا ونڄ سڳے ، بی جے پی کشمیر اچ پنج سالاں اچ 8 سیاسی جماعتاں لانچ کیتیاں تاں جوگزریل انتخابات اچ انہاں کوں کوئی امیدوار نی ملیا ، کشمیریاں سارے جبر مسترد کرتے انسانی حقوق دی ڳالھ کرݨ آلے انجینئر رشید اتے آغا روح اللہ تے ایجھے امیداوارں کوں کامیاب کیتا جنہاں ایوان اچ کشمیر دی خصوصی شناخت ختم کرݨ تے احتجاج کیتا، کشمیر اچ 50 ہزار توں ودھ مندر تعمیر کرݨ دا وی کوئی فیدہ نی تھیا کشمیری اے جنگ جت چکئن اساں پاکستان دی طرفوں سیاسی، سفارتی اتے اخلاقی حمایت تے شکر گزار ہیسے ،5 اگست دے اقدام دے خلاف پاکستان اچ ہر جاہ کشمیر نظر آندے
