اسلام آباد۔13جون (اے پی پی):وفاقی وزیر پاور سردار اویس لغاری نال امریکی محکمہ خزانہ دے وفد ملاقات کیتی۔ امریکی وفد دی قیادت اسسٹنٹ سیکرٹری خزانہ برینٹ نیمن کریندے پئے ہن ۔ ملاقات دا مقصد توانائی دے شعبے اچ تعاون ودھاوݨ ہئی ۔جاری اعلامیہ موجب وفاقی وزیر پاور سردار اویس لغاری آکھیے پاور سیکٹر اچ خامیاں دور کرݨِ سانڳے اصلاحاتی پلان بݨا ڳھدے انہاں اصلاحات دا مقصد پاکستان دے انرجی مکس کوں بہتر بݨاوݨ تے پاور سیکٹر دی باقی خرابیاں کوں دور کرݨا اے ۔ وفاقی وزیر ݙسایا پاکستان اچ بجلی دی تقسیم اتے ترسیل اچ نجی شعبے دی شراکت ودھاوݨ سانڳے اصلاحات نافذ کیتیاں ویندیاں پئن ۔ انہاں اصلاحات دا مقصد پاکستانی عوام کوں ݙتی ونڄݨ آلی سروسز دے معیار کوں چنڳاں بݨاوݨ اے ۔ قرض دے انتظام دے حوالے نال وفاقی وزیر آکھیے پاکستان پنکھے دی تبدیلی دا پروگرام شروع کریندا پئے جیں توں توانائی دی بچت تھیسی سردار اویس لغاری موسمی پیداوار تے طلب دے فرق کوں مکاوݨ سانڳے امریکی تکنیکی مدد دی لوڑھ دی ڳالھ کیتی ۔ انہاں پاکستان دے پاور سیکٹر سانڳے زیادہ سازگار شرح تے بین الاقوامی فنانسنگ گھنݨ اچ امریکی امداد دی اہمیت تے زور ݙتا ۔ امریکی معاون وزیر خزانہ پاکستان دے پاور سیکٹر اچ اصلاحات دے اقدامات دی تعریف کیتی تے پاکستان دے پاور سیکٹر دے مسئلیں دے حل سانگے ہر ممکن تعاون دا یقین ݙیوائے۔
