اسلام آباد۔11ستمبر(اے پی پی) نگران وزیراعظم انوارالحق کاکڑ آکھیے قائد اعظم دی قیادت دے بغیر مسلماناں سانڳے آزاد ریاست دا خواب کݙاہیں شرمندہ تعبیرنہ تھیندا ۔ بابائے قوم ، قائد اعظم محمد علی جناح دی وفات دے ݙینھ تے آپݨے سنھیے اچ نگراں وزیراعظم آکھیے جو قائد اعظم دی جدوجہد ناصرف ھک اکثریت دی اقلیتاں دے حقوق کوں عددی برتری دی بنا تے مکاوݨ دے نظریے دے خلاف ہئی بلکہ مسلماناں دی ھک انڄ قوم دے طور تے تہذیبی سنڄاݨ تے ھک وکھری طرزِ زندگی کوں بحال کرݨ تے انہاں کوں اقوامِ عالم اچ ھک نمایاں مقام ݙیواوݨ سانڳے ہئی ۔نگراں وزیراعظم آکھیے پاکستان ایں ویلھے اوکھے دور توں لنگھدا پئے تے اساکوں جتنا اڄ قائد دے اصولاں تے عمل کرݨ دی لوڑھ اے شاید توں پہلے کݙاہیں نہ ہئی ۔ انہاں آکھیے جو قائدِ اعظم کوں خراجِ عقیدت پیش کرݨ دا ایں توں بہتر کائی ٻیا طریقہ کائنی جو اساں قائد اعظم دے سنہری اصولاں تے عمل کرتے پاکستان کوں اسلامی فلاحی ریاست بݨاؤں۔
