اسلام آباد۔14مارچ (اے پی پی):وزارتِ مذہبی امور و بین المذاہب ہم آہنگی کلیار شریف بھارت اچ حضرت خواجہ علاؤالدین علی احمد صابر ؒ دے سالانہ عرس اچ شرکت دے خواہشمند پاکستانی زائرین توں 31مارچ، 2023تئیں زیارت فارم دے ذریعے درخواستاں منگ ڳھدن ۔ درخواستاں دے رلے وزارت دے ناں ھک ہزار روپے (Rs.1000/-)دا ناقابلِ واپسی بینک ڈرافٹ لَف کرݨ لازم اے۔ عرس دی تقریبات 25ستمبر توں 2اکتوبر2023ء، کلیار شریف بھارت اچ جاری رہسن ۔ وزارت توں جاری بیان موجب 200پاکستانی زائرین کوں عرس اچ شرکت کیتےانڈیا بھجوایا ویسی۔ عرس کیتے درخواستاں زیادہ موصول تھیوݨ تے 5 مئی 2023ءکوں ݙینھ 11وڄے وزارتِ مذہبی امور و بین المذاہب ہم آہنگی اچ قرعہ اندازی دے ذریعے 200زائرین دا انتخاب کیتا ویسی ۔عرس متعلق ٻئی تفصیلات ہدایات درخواست فارم وزارت دی ویب سائٹ اتے فیس بک پیج تے دستیاب ہن۔ وزارت پراݨے فارم تے کوئی درخواست قبول نہ کریسی ۔عوام دی آگاہی کیتے اے وی تاکید کیتی ویندی اے جو ساریاں درخواستاں وزارت اچ براہ راست بھجوائیاں ونڄن۔ وزارت کہیں فرد/ادارے یا کمپنی کوں خود توں درخواستاں جمع کرݨ یا پراسس کرݨ دی اجازت نی ݙتی ۔
