اسلام آباد۔27اکتوبر(اے پی پی):صدر مملکت ڈاکٹر عارف علوی وفاقی محتسب دے حکم دے خلاف ایئر یونیورسٹی دی درخواست مسترد کریندے ہوئیں کورونا دی وجہ توں بی ایس ڈگری دے بقایا کورسز مکمل کرݨ توں قاصر رہݨ آلی طالبہ کوں اپݨی ڈگری مکمل کرݨ سانڳے اضافی سال ݙیوݨ دے معاملے تے نظر ثانی کرݨ دی ہدایت کرݙتی ۔ صدر مملکت یونیورسٹی دی طرفوں طالبہ دے کیس تے وختی کاروائی نہ کرݨ تے کاوڑ کیتی تے آکھیے جو ہائر ایجوکیشن کمیشن دی پالیسی اتے یونیورسٹی قواعد اچ توسیع ݙے تے ایجھے مسئلے حل کرݨ دی دفعات موجود ہن ۔ یونیورسٹی کنے ایچ ای سی دی پالیسی اتے سفارشات توں انحراف کرݨ دی کوئی وجہ کائنی ۔ انہاں آکھیے یونیورسٹی بدانتظامی دی درستگی دی بجائے عوامی خزانے اتے طلبہ دے ویلھے دے ضیان کوں سامݨے رکھے بغیر محتسب دے فیصلے دے خلاف درخواست دائر کیتی۔ صدر مملکت ایئر یونیورسٹی تے زور ݙتے جو طالبہ دی لڳن، محنت اتے سرمایے کوں ضائع نہ تھیوݨ ݙتا ونڄے تے سارے طلباء بالخصوص طالبات دی مدد اتے رہنمائی سانڳے اقدامات کیتے ونڄن ۔ ایوان صدر دے پریس ونگ موجب ایئر یونیورسٹی دی اقراء منیر نامی طالبہ وفاقی محتسب کوں شکایت کیتی ہئی جو او ایئر یونیورسٹی نال منسلک کالج اچ سائیکالوجی پروگرام اچ بیچلر آف سائنس (آنرز) دی طالبہ اے، انہاں کورونا اچ مبتلا تھیوݨ دی وجہ توں 2020 ء اچ ڈگری مکمل نی کرسڳی ۔ ڈگری مکمل کرݨ سانڳے ھک اضافی سال کیتے یونیورسٹی نال رابطہ کرݨ تے طالبہ کوں ایچ ای سی نال رابطے دا آکھیا ڳیا ۔ ایچ ای سی مجاز اتھارٹی کوں میڈیکل ہسٹری اتے یونیورسٹی قواعد کوں سامݨے رکھیندے ہوئیں توسیع دے معاملے تے غور کرݨ دی سفارش کیتی ہئی تے لیکن ھک سال گزر ونڄݨ دے باوجود توسیع نہ ملں تے طالبہ وفاقی محتسب کوں درخواست کیتی ۔ وفاقی محتسب ایئر یونیورسٹی کوں اقراء منیر دا کیس یونیورسٹی فنکشنل کمیٹی دے سامݨے نظر ثانی کیتے رکھݨ دا حکم ݙتا ہئی جیں دے خلاف یونیورسٹی صدر مملکت کوں درخواست کیتی۔ صدر مملکت اپݨے فیصلے اچ قرار ݙتے جو یونیورسٹی ایچ ای سی دی سفارشات تے عمل نی کیتا تے کیس مجاز اتھارٹی دے سامݨے نی رکھیا ، طالبہ کورونا دی وجہ توں بیمار تھئی، ڈگری مکمل کرݨ سانڳے اضافی وقت گھنݨ سانڳے بھج دھرک کرݨی پئی۔ صدر مملکت آکھیے ایچ ای سی پالیسی دے مطابق ڈگری مکمل کرݨ دی مدت 6 سال اے جیڑھی جو منظوری دے بعد ھک سال تئیں مزید ودھائی ونڄ سڳدی اے۔
