اسلام آباد۔15اکتوبر (اے پی پی):وفاقی وزیر اطلاعات و نشریات چوہدری فواد حسین آکھیے جو رسول اکرم ﷺدی ذات اقدس حق دا پیغام اے، ایندی روشنی اچ اساں اڳوں ودھسوں ، عشرہ رحمت للعالمین دی تقریبات دے موقع تے ”پیغام پاکستان“متعلق عوام اچ آگاہی پیدا کرتے اساں ھک ایجھے معاشرے دی تشکیل ممکن بݨیندے پیوں جیڑھی جو جو رواداری اتے برداشت تے مبنی ہووے۔ اے ڳال انہاں جمعے کوں اتھاں وفاقی وزیر مذہبی امور پیر نور الحق قادری دے رلے 12 ربیع الاول یوم ولادت رسول ﷺدے موقع تے تقریبات دے حوالے نال انتظامات دا جائزہ گھنݨ کیتے اجلاس دی صدارت کریندے ہوئیں آکھی اے ۔ ایں موقع تے سینیٹ دی قائمہ کمیٹی اطلاعات و نشریات دے چیئرمین سینیٹر فیصل جاوید وی موجود ہن۔ وفاقی وزیر اطلاعات آکھیے جو نبی کریمﷺ دی سیرت طیبہ اتے انہاں دی تعلیمات پورے معاشرے کیتے عملی نمونہ ہن، اساکوں سیرت طیبہ کوں عملی طور تے آپݨی زندگی اچ اپناوݨا چاہیدے ۔ اجلاس اچ ڳال کریندے ہوئیں وفاقی وزیر مذہبی امور پیر نور الحق قادری آکھیے جو اساں آپݨی زندگیاں کوں اسوہ رسول دے مطابق ڈھال تے آپݨے مسئلے دا حل کڈھ سڳدوں ، انہاں اجلاس کوں ݙسائے جو عشرہ شان رحمت دے سلسے اچ وزارت مذہبی امور 20 اکتوبر تئیں مختلف موضوعات دا شیڈول جاری کیتے ۔ انہاں انہاں موضوعات کوں سامݨے رکھیندے ہوئیں سیرت کانفرنساں دے انعقاد تے زور ݙتے ۔ وفاقی وزرا وزیراعظم دی ہدایت دے مطابق 12 ربیع الاول یوم ولادت رسول شایان شان طریقے نال مناوݨ دے عزم دا اظہار کیتے ۔ انہاں آکھیے جو رحمت للعالمینﷺ اتھارٹی دے قیام دا اعلان خوش آئند اے، ایں اتھارٹی دے ذریعے نوجوان نسل کوں مسلماناں دی تاریخ اتے اسلامی انقلاب دے پہلوواں توںروشناس کرایا ویسی ۔ اجلاس کوں ݙسایا ڳئے جو 12 ربیع الاول کوں وݙیاں تقریباں تھیسن ، ھک تقریب ایوان صدر اتے ݙوجھی کنونشن سینٹر اچ تھیسی ۔ وزیراعظم وݙے مذہبی اجتماع توں خطاب کریسن ۔
