اسلام آباد۔6مارچ(اے پی پی) پاکستانی شوبزشخصیات مرحوم اداکار قوی خان دے انتقال تے ݙکھ تے افسوس کیتے ۔ ایں حوالے نال اداکارعدنان انصاری سوشل میڈیا تے مرحوم اداکار قوی خان دے انتقال کوں شوبز انڈسٹری کیتے ٻہوں وݙا ضیان قرار ݙیندے ہوئیں لکھیے جو اڄ دے پسندیدہ اداکار ، بہترین دوست تے استاد ایں دنیا توں ٹرڳئن جنہاں دی اداکاری ہمیشہ انہاں کوں متاثر کیتا ۔انہاں مزید لکھیے جو انہاں مرحوم قوی خان دے نال کم کریندے ہوئیں سکھݨ کوں ٻہوں کجھ خاص طور تے ویلھے دی پابندی دا سلیقہ ملیا ۔ اداکارعمران اشرف مرحوم کیتے محبت دا اظہار کریندے ہوئیں لکھیے جو آپ ہمیشہ میݙی یاداں اچ رہسو ۔ اداکارہ ثمینہ پیرزادہ ایں حوالے نال ٹویٹ کیتے جو مرحوم قوی صاحب چلے ڳن لیکن پورے پاکستان کوں اداس کرڳن ۔انہاں مزید لکھیے او ھک بہترین اداکار ہووݨ دے نال نال ھک بہترین انسان ہن جنہاں نال کم کریندے ہوئیں سکھݨ کوں ٻہوں کجھ ملیا ۔ اداکار شان تے سجل علی قوی خان دے انتقال تے ݙکھ تے افسوس کریندے ہوئیں لکھیے فلم ، ٹی وی اتے تھیٹر اچ انہاں جتنا کم کیتے او نہ بھلاوݨ دے قابل اے ، انہاں آکھیے او صرف ھک اداکار ننی بلکہ لوکاں دے دلاں تے راڄ کرݨ آلی شخصیت وی ہن جنہاں کوں ہمیشہ یاد رکھیا ویسی ۔ ایں توں انڄ اداکار سمیع خان ، یمنی زیدی ، بشری انصاری ، جنید خان ، احد رضامیر، عثمان مختار، صبور علی ، سہیل احمد ، کنزہ ہاشمی ،منیب بٹ تے ٻئی سیاسی شخصیات وی مرحوم اداکار دے انتقال تے ݙکھ تے افسوس کیتے ۔
