اسلام آباد۔24جون(اے پی پی)وزیراعظم شہباز شریف آکھیے جو ترقی کیتے سارے صوبیاں اتے علاقیاں کوں نال ڳھن تے ٹرݨا ہوسی، بیرونی قرض تے انحصار دی بجائے زراعت، صنعت سودھا مختلف شعبیاں اچ خودکفالت ودھاوݨی ہوسی، چین اتے ٻعے سنڳتی ملک سرمایہ کاری نال ساݙی ترقی اتے خوشحالی اچ ہتھ ونݙیندے پین، ساکوں غیر ملکی سرمایہ کاری دا محافظ ٻݨنا ہوسی، وفاقی حکومت بلوچستان دے مسلے تیکھے حل کریسی، گوادر دے مچھیراں کوں ٻیڑیاں کیتے 2 ہزار انجن ݙیسوں۔ اے ڳالھ انہاں گوادر دے دورے ویلھے تقریب نال خطاب اچ آکھی۔ انہاں آکھیا جو گوادر دے واسیاں دے مسلے حل کرݨ ترجیح اے، بلوچستان دے سارے سملے حل کیتے ویسن، ایں سانڳے فریقاں نال صلاح مشورہ کوں اہمیت ݙتی ویسی جو مقامی شہریاں دے مسائل حل نا تھیون تاں ترقی بے کار ویندی اے۔ تقریب نال وزیراعلی بلوچستان عبدالقدوس بزنجو وی خطاب کیتے۔ وزیراعظم ہک ݙینھ دے دورے تے گوادر پڄین جتھاں او انڈس ہسپتال اتے گوادر ڈویلپمنٹ اتھارٹی وچال عالمی معیار دا ہسپتال ٻݨاوݨ دی مفاہمتی یاداشت تے دستخط دی تقریب اچ شرکت کریندے پن۔
