اسلام آباد۔21مئی (اے پی پی):وزیراعظم شہباز شریف چین پاکستان سفارتی تعلقات دے قیام دی 71ویں سالگرہ تے صدر شی جن پنگ، ݙوہیں ملکاں دیاں حکومتاں تے عوام کوں مبارخ ݙیندے ہوئیں آکھیے جو ویلھے دی کوئی اندھاری ، عالمی حالات دا کوئی طوفان اتے حسد دی کوئی بھاہ پاکستان تے چین دے فولادی بندھن تے اثرانداز نی تھی سڳی ، پکا عزم اے جو آئرن بھرا دا اے مثالی بندھن مزید اتے ، سانجھا تعاون، اعتماد اتے قربتاں دی نویں رفعتاں توں ہمکنار تھیوے۔ پاک چین سفارتی تعلقات دی 71 ویں سالگرہ تے آپݨے پیغام اچ وزیراعظم شہباز شریف آکھیے جو چین اتے پاکستان ݙو بھراویں دے ناں ہن ، اڄ او مبارخ ݙینھ اے جݙاں ݙوہیں ملکاں یاری دے ٻوٹے دا بج رادھا ہئی جیڑھا جو 70 سال اچ ھک توانا اتے پھل دار وݨ چھاں ݙیوݨ آلا بݨ ڳئے، 21 مئی 1950 توں 2018 تئیں ݙوہیں ملکاں دی قیادت اتے عوام یاری اے ایں سدا بہار وݨ کوں پروان چڑھایا۔ وزیراعظم آکھیے جو میں چین تے پاکستان دے شروع توں آخر سارے قائدین اتے رہنماواں کوں سلام پیش کرینداں جنہاں ایں بے مثال دوستی کوں کوآپریٹو سٹرٹیجک پارٹنرشپ اتے آئرن بھراویں دے ڳانڈھے اچ پاتے ،انہاں آکھیے اساں ساریں انہاں پیاریں کوں وی خراج عقیدت پیش کریندوں جنہاں دی جان پاک چین دوستی دی وجہ توں ڳھدی ڳئی ، جامعہ کراچی دے ٻاہر ساݙے چینی بھراویں تے بھیݨاں کوں نشانہ بݨایا ڳیا، اساں انہاں سودھے پاک چین دوستی تے قربان تھیوݨ آلیں کوں سلام پیش کریندوں ۔
