اسلام آباد۔11جولائی (اے پی پی) وزیراعظم محمد شہباز شریف آکھیا جو فیڈرل بورڈ آف ریونیو اچ اصلاحات اتے مکمل ڈیجیٹائز یشن اساݙی معاشی بقا دا مسئلہ اے۔ ساری پورٹس تے کسٹمز آپریشنز کوں شفاف اتے کرپشن فری ٻݨاوݨ بارے اقدامات کیتے ویسن۔ صنعتاں اتے مصنوعات کوں تحفظ ݙیوݨ کیتے انڈر انوائسنگ دا خاتمہ کیتا ونڄے،کسٹمز ڈیوٹی دےبھرپور نفاذکیتےجدید ٹیکنالوجی،مصنوعی ذہانت اتے آلات دا استعمال کیتا ونڄے۔ خمیس کوں وزیراعظم آفس دے میڈیاونگ توں جاری بیان موجب اے ڳالھیں انہاں آپݨی صدارت اچ پاکستان کسٹمز اتے فیڈرل بورڈ آف ریونیو دے معاملیاں بارے اجلاس اچ آکھی۔ اجلاس اچ وفاقی وزیر اقتصادی امور احد خان چیمہ ، وفاقی وزیر خزانہ تے محصولات محمد اورنگزیب، وزیر مملکت برائے خزانہ تے محصولات علی پرویز ملک ،ڈپٹی چیئرمین پلاننگ کمیشن جہانزیب خان، اٹارنی جنرل منصور اعوان ، وزیراعظم دے کوآرڈینیٹر رانا احسان افضل ، رکن قومی اسمبلی بیرسٹر عقیل ملک ،چیئر مین ایف بی آر زبیر ٹوانہ اتے متعلقہ اعلیٰ سرکاری افسرشریک تھیے۔ وزیراعظم محمد شہبازشریف آکھیا جو کسٹمز دا شعبہ پاکستان دی معیشت اچ ریڑھ دی حیثیت رکھیندے۔ فیڈرل بورڈ آف ریونیو اچ اصلاحات اتے مکمل ڈیجیٹائز یشن اساݙی بقا دا مسئلہ اے۔ وزیراعظم ہدایت کیتی جو ایف بی آر اتے بئے اداریاں اچ اصلاحاتی منصوبیاں دا تھر پارٹی آڈٹ ہر سطح تے یقینی ٻݨایا ونجے۔ فیڈرل بورڈ آف ریونیو اچ جاری ساری اصلاحات اتے ڈیجیٹائزیشن دے سارے منصوبیاں کوں ہکی چھت تلوں آندا وںجے۔ ایف بی آر انفورسمنٹ دا نظام بہتر کر تے محصولات ودھائے ونڄن۔ وزیراعظم آکھیا جو کسٹمز دے نظام اچ اصلاحات بارے جاری منصوبے کیتے پراجیکٹ مینجمنٹ یونٹ دا فوری ٻݨایا ونڄے۔ پاکستان دی صنعتاں اتے مصنوعات کوں تحفظ ݙیوݨ کیتے انڈرانوائسنگ دا خاتمہ کیتا ونڄے۔ وزیراعظم آکھیا جو انفورسمنٹ دے ذریعے کتنا ریونیو کٹھا تھیے اوندی تفصیل ݙسائی ونڄے۔ شپنگ دے شعبے دے آپریشنز بارے ریگولیٹری فریم ورک ٻݨایا ونڄے۔ کسٹمز دے ویب بیسڈ ون کسٹمز سسٹم دا تھرڈ پارٹی آڈٹ کروایا ونڄے۔ اجلاس اچ پاکستان کسٹمز دے معاملے اتے اصلاحات تے بریفنگ ݙتی ڳئی۔ بریفنگ اچ ݙسیا ڳئیا جو پاکستان کسٹمز دے معاملے خودکار ںظام تے منتقل تھی ڳئن۔ انہاں اصلاحات نال نواں سسٹم آندا ویسی جیڑھی جو جدید اتے مصنوعی ذہانت دا ہوسی۔ 24 ۔2023 اچ درآمدات اتے برآمدات دا 72.4 فیصد حصہ گرین چینل توں کلیئرکیتا ڳئے۔ جولائی 2023 توں جون 2024 تئیں پاکستان کسٹمز ویلیو ایشن کنٹرولز دے ذریعے 240 ارب روپے دا ودھیکی ریونیو حاصل کیتے جیڑھا جو گزریل سال توں اسی فیصد ودھ اے۔
