اسلام آباد۔14نومبر(اے پی پی) نگراں وزیراعظم انوار الحق کاکڑ پاکستان اتے ازبکستان وچال تعلقات مزید بہتر بݨاوݨ دی لوڑھ تے زور ݙیندے ہوئیں آکھیے جو سوکھا ویزہ طریقہ کار تے بہتر بینکنگ چینلز نال ݙوہیں ملکاں وچال تجارت کوں مزید ودھارا ملسی ، انہاں امید ظاہر کیتی جو ݙوہیں ملکاں دی تاجر برادری تھوڑے ویلھے اچ ھک ارب ڈالر دے سانجھے تجارتی ہدف کوں سوکھیں گھن سڳسن ، منگل کوں وزیراعظم آفس دے میڈیا ونگ توں جاری بیان موجب نگراں وزیراعظم انوار الحق کاکڑ نال ازبکستان دے نائب وزیر اعظم ڈاکٹر جمشید خدجایو عبدوخاکومووچ ست رکنی وفد دے رلے ملاقات کیتی۔ وزیر اعظم ، نائب وزیر اعظم تے انہاں دے وفد دا پاکستان اچ خیرمقدم کیتا تے 8 توں 9 نومبر 2023 تئیں ازبکستان دے شہر تاشقند اچ تھیوݨ آلی 16ویں ای سی او سربراہی اجلاس دے موقع تے ازبکستان دے صدر شوکت مرزیوف نال آپݨی اڄوکی ملاقات دا ذکر کریندے ہوئیں ݙوہیں ملکاں وچال تجارت، دفاع اتے رابطے دے شعبیں اچ ݙو پاسے تعلقات دی رفتار تے اطمینان دا اظہار کیتے۔ انہاں اسلام آباد اچ پاکستان، ازبکستان تے افغانستان دے وزرائے تجارت دے پہلے سہ فریقی اجلاس کراوݨ دی تعریف کیتی ۔ ترائی فریقاں کسٹم، لاجسٹکس، تجارت دے ودھارے ٹیرف، ٹی آئی آر دے طریقہ کار تے ڳالھ مہاڑ کیتے سہ فریقی ورکنگ گروپ وی بݨائے۔ سہ فریقی اجلاس دے نتیجے تے اطمینان دا اظہار کریندے ہوئیں وزیر اعظم امید ظاہر کیتی جو سہ فریقی طریقہ کار ترائی ملکاں وچال تجارتی تعلقات ودھیسی ۔ وزیراعظم ݙوہیں ملکاں دے عوام وچال تبادلیں تے تعلقات مزید بہتر بݨاوݨ دی لوڑھ تے زور ݙتا ۔ازبک نائب وزیر اعظم انہاں تے انہاں دے وفد دے پر تپاک استقبال تے وزیر اعظم دا شکریہ ادا کیتا۔ انہاں وزیراعظم کو ں بینکنگ اتے لاجسٹکس دے شعبیں سودھے پاکستان دی تاجر برادری نال نتیجہ خیز ملاقاتاں دا ݙسائے ۔ انہاں امید ظاہر کیتی جو ݙوہیں فریق ازبکستان-افغانستان-پاکستان ریلوے پراجیکٹ دی وی تکمیل کیتے فعال ڳالھ مہاڑ جاری رکھیسوں ۔ ازبکستان دے وفد اچ وزیر ٹرانسپورٹ الخم مخکاموف رستمووچ، نائب وزیر سرمایہ کاری، صنعت و تجارت بدری الدین عابدوف، نائب وزیر خارجہ، بابور عثمانوف، سٹیٹ سکیورٹی سروس دے ڈپٹی چیئرمین میجر جنرل فرخ مختارئوف تے پاکستان اچ ازبکستان دے سفیر میجر جنرل فرخ مختاروف اویبیک عارف عثمانوف شامل ہن۔ ملاقات اچ وزیر تجارت گوہر اعجاز توں علاوہ سیکرٹری تجارت، بورڈ آف انویسٹمنٹ اتے ٻئے اعلیٰ حکام شامل ہن ۔
.jpg)
