شرم الشیخ۔11نومبر (اے پی پی) وفاقی وزیر برائے موسمیاتی تبدیلی سینیٹر شیری رحمان آکھیا جو پاکستان ہک تکلیف دہ اتے تباہ کن چھل توں گزردا پئے جئیں نال 33 ملین توں ودھ لوک متاثر تھین۔ اے ڳالھیں انہاں کوپ-27 اچ انٹرنیشنل واٹر مینجمنٹ انسٹی ٹیوٹ اتے ایف اے او ولوں واٹر پویلین اچ اعلیٰ سطحی سیگمنٹ: تھیمیٹک ڈے 3: ’’ڈیزاسٹر رسک ریڈکشن (ڈی آر آر) اتے بہتر معاش کیتے پائیدار شہر‘‘ توں خطاب کریندیں ہوئیں آکھی۔ انہاں آکھیا جو پاکستان دا تقریباً ہک ترائے حصہ چھل دے پاݨی اچ بݙ ڳے اتے آفت دے بعد دی ضروریات دے تخمینے دے مطابق مجموعی طور تے 30 بلین ڈالر دا نقصان تھیے۔ انہاں ٻیا آکھیا جو معاش دے ذرائع، زراعت اتے خوراک شدید متاثر تھین اتے صدی دے ریکارڈ چھل پورے ملک دی ٹوپوگرافی کوں بدل ݙتے۔ انہاں ایں سال پاکستان اچ چھل پاروں تھیوݨ آلے نقصان اتے چھل دے خطرے دے انتظام، موافقت اتے دریائے سندھ دے نظام دی لچک اچ لیونگ انڈس انیشی ایٹو دی اہمیت تے زور ݙتا۔ پاکستان دی بحالی اتے موافقت دی لوڑھ تے ڳالھ کریندیں ہوئیں وفاقی وزیر لیونگ انڈس انیشی ایٹو داہک جائزہ پیش کیتا۔ وفاقی وزیر شیری رحمٰن شرم الشیخ اچ کوپ-27 دے پاکستان پویلین اچ ’’دی لیونگ انڈس: این ایکسز آف ایڈاپٹیشن‘‘ دے عنوان نال پینل ڈسکشن توں وی خطاب کیتا۔ انہاں نال وفاقی وزیر تجارت سید نوید قمر، پاکستان اچ اقوام متحدہ دے ریزیڈنٹ کوآرڈینیٹر جولین ہارنیس اتے انوائرمنٹ جرنلسٹ عافیہ سلام وی موجود ہن۔ پینل دے ماڈریٹر احمد رفیع عالم ہن۔
