اسلام آباد۔6اکتوبر (اے پی پی) وزیراعظم محمد شہباز شریف آکھیا جو او تباہ کن چھل دے بعد مدد دی خیرات نی، آلودگی کھنݙاوݨ آلے ملکاں توں ماحولیاتی انصاف چاہندوں، مالی تعاون قرضیاں دی صورت اچ نی ہووݨا چاہیدا، عالمی برادری کوں چھل متاثرین دی بحالی اتے تعمیر نو کیتے ٻئے بہتر اتے وݙے منصوبے نال اڳوں آوݨا چاہیدے۔ اے ڳالھیں انہاں برطانوی اخبار’’دی گارڈین‘‘کوں انٹرویو اچ آکھی۔ انہاں آکھیا جو چھل نال پاکستان اچ شدید تباہی تھئی اے اساکوں چھل دے بعد آلودگی کھنݙاوݨ آلے امیر ملکاں دے سامھے کشکول پھیلاوݨ تے مجبور نی کیتا ونڄ سڳدا، انہاں کوں عالمی برادری توں ماحولیاتی انصاف چاہیدے۔ وزیراعظم خبردار کیتا جو پاکستان کوں مون سون دی شدید بارشاں دے بعد صحت، تحفظ خوراک اتے عارضی طور تے بے گھر تھیوݨ آلیاں دی بحالی جیھےوݙے چیلنجز دا سامݨا اے۔ شہباز شریف آکھیا جو میں آپݨٰی حیاتی اچ اتنے وݙے پیمانے تے تباہی اتے آپݨی عوام دے مصیبتاں نی ݙٹھی، او آپݨے ملک اچ ماحولیات توں متاثر مہاجرین ٻݨ ڳئن۔ انہاں عالمی برادری ولوں ݙتے ڳئے ارباں روپے دے فنڈز، عطیات اتے ٻئی مدد دے وعدیاں کوں ناکافی قرار ݙیندیں ہوئیں آکھیا جو ایں ماحولیاتی تبدیلی نال اساݙے ملک اچ تھیوݨ آلی تباہی معاشی وسائل توں ٻاہر اے۔ وزیراعظم ماحولیاتی انصاف بارے نشابر کریندیں ہوئیں آکھیا جو اساں کہیں الزام تراشی نی کریندے، اساں جیڑھا کجھ ݙیکھدے پیوں اے اساݙا کیتا نی بلکہ اساں ایں توں متاثر ہیسے۔ کیا میکوں کشکول چا تے مدد منڳݨی چاہیدی اے؟ وزیراعظم آکھیا جو او ہمدردارنہ بیانات تے شکرگزار ہن پر انہاں اعلانات کوں عملی جامہ پواوݨ ٻہوں اہم اے۔ شہباز شریف آکھیا جو امیر ملکاں ہک ݙھاکے پہلے ترقی پذیر ملکاں کیتے کہیں موسمیاتی تبدیلی دی صورتحال نال نٻݨݨ کیتے ہک سال اچ سو ارب ڈالر ماحولیاتی فنڈ اچ ݙیوݨ دا اعلان کیتا ہئی ، اے رقم کتھ اے؟ امیر ملکاں کنے آپݨے وعدے پورا کرݨ دا چنڳا ویلھا اے۔
