اسلام آباد/بخارسٹ۔29ستمبر (اے پی پی):وزیر انفارمیشن ٹیکنالوجی سید امین الحق گزریل ݙینھ رومانیہ اچ میٹا دے اعلیٰ سطحی وفد نال ملاقات کیتی اے ۔ملاقات اچ وفاقی وزیر تے وفد سرمایہ کاری دے موقع تے پاکستان اچ سوشل میڈیا کمپنی دے رابطہ دفتر دے قیام تے ڳالھ مہاڑ کیتی ، ایں موقع تے سید امین الحق آکھیے جو پاکستان اچ فیس بک دے دفتر دا قیام اہم اے۔پاکستان دی 220 ملین دی آبادی اچ ، فیس بک دے صارفین دی تعداد 45 ملین توں ودھ اے ۔ جیویں ہی رابطے دے منصوبے مکمل تھیسن ، اڳلے کجھ سالاں اچ اے تعداد ݙوگنا تھی ویسی ،وفاقی وزیر مزید آکھیے جو اے سوشل میڈیا کمپنی کیتے ضروری اے جو صارفین نال وختی رابطے کیتے پاکستان اچ اپݨا دفتر قائم کرے ۔میٹا پاکستان اچ تکھے کھنڈدے رابطے تے انٹرنیٹ صارفین دی تعداد ودھݨ تے اطمینان دا اظہار کیتے۔فیس بک دے وفد آکھیے جو مستقبل اچ سانجھے تعاون کوں یقینی بݨاوݨ کیتے میٹا ورس تےانٹرنیٹ دی لوڑھ اے ۔فیس بک دے وفد وختی پاکستان دا دورہ کرݨ دا عندیہ ݙتے ۔ملاقات اچ اقوام متحدہ دے جنیوا آفس اچ پاکستان دے مستقل نمائندے خلیل ہاشمی اتے پاکستان دے سفیر ڈاکٹر ظفر اقبال وی موجود ہن جݙاں جو یونیورسل سروس فنڈ دے چیف ایگزیکٹو حارث محمود چوہدری میٹا دے وفد کوں پاکستان اچ براڈ بینڈ سروسز دے منصوبیں تے بریفنگ ݙتی ۔فیس بک دے وفد اچ ڈاکٹر اسماعیل شاہ، ڈاکٹر رابرٹ پیپر، تھامس نیوین، مائیکل سیٹلن، مارک گیرورڈ اتے الریا بینسیونگا شامل ہن۔
