اسلام آباد۔11اگست(اے پی پی) وزیراعظم محمد شہباز شریف آکھیے ساݙی اقلیتی برادریاں پاکستانی قومیت دا بنیادی حصہ ہن، دفاع ،تعلیم، صحت اتے سماجی خدمت سودھے زندگی دے سارے شعبیں اچ ساݙے غیر مسلم بھراویں تے بھیݨاں کلیدی کردار ادا کیتے ، ساݙا آئین ذات پات، نسل اتے رنگ دے امتیاز دے بغیر سارے شہریاں کوں سماجی، سیاسی، مذہبی اتے معاشی حقوق ݙیوݨ دی ضمانت ݙیندے،بین المذاہب ہم آہنگی ساݙی قومی شناخت دی واضح خصوصیت اے۔ وزیراعظم آفس دے میڈیا ونگ توں جاری بیان موجب اقلیتاں دے قومی ݙینھ دے موقع تے وزیراعظم شہباز شریف اپݨے پیغام اچ آکھیے اڄ اساں اقلیتاں دے قومی ݙینھ تے پاکستان دے امن، ترقی اتے خوشحالی اچ غیر مسلم پاکستانی شہریاں دے کردار کوں منیندے پیوں ، ساݙی اقلیتی برادریاں پاکستانی قومیت دا بنیادی حصہ ہن ، آزادی دی جد وجہد توں گھن تے اڄ تئیں پاکستانی اقلیتاں ملک دی تعمیر اچ مثبت کردار نبھائے ، دفاع ہووے یا تعلیم، صحت ہووے یا سماجی خدمت، زندگی دے سارے شعبیں اچ ساݙے غیر مسلم بھراویں تے بھیݨاں کردار ادا کیتے ۔ اڄ دا ݙینھ ساݙی توجہ قائد اعظم دی قانون ساز اسمبلی اچ کیتی ڳئی تاریخی تقریر دے پاسے ݙویندی اے جیں اچ انہاں نویں ریاستِ پاکستان دے شہریاں کیتے رہنما اصول بݨائے ہن انہان پاکستان دا تصور غیر مسلم بھرا تے بھیݨاں دے بغیر نامکمل اے،ساݙے ملک دے جھنڈے اچ چٹا حصہ ملک اچ اقلیتی برادری دی جاہ دی علامت اے ۔
