اسلام آباد۔19اکتوبر(اے پی پی) وزیر مملکت قانون و انصاف شہادت اعوان آکھیے جو ماڈل کورٹس دے حوالے نال سپریم کورٹ کوں اساں 15 خط لکھئن مگر حالی تئیں ایندا کوئی جواب نی آیا ، اساکوں ھک موقع ٻیا ݙتا ونڄے ، سپریم کورٹ دی طرفوں اساکوں آکھیا ڳئے جو چیف جسٹس پاکستان توں پچھ تے ایں حوالے نال خط دا جواب ݙتا وںڄے۔ قومی اسمبلی اچ سوالاں دے وقفے اچ طاہرہ اورنگزیب دے ماڈل کورٹس دے حوالے نال جواب نہ آوݨ تے ریمارکس تے وزیر مملکت قانون و انصاف شہادت اعوان آکھیے جو ماڈل کورٹس دے حوالے نال اساں 15 خط لکھئن ۔ گزریل ݙینھ جوڈیشل اکیڈمی کوں وی خط لکھیے، ماڈل کورٹس دا نظام سابق چیف جسٹس آصف سعید کھوسہ متعارف کرایا ہئی۔ ایں دا مقصد فوری انصاف ݙیوݨ ہئی ، اساکوں ݙسایا ڳئے جو چیف جسٹس آف پاکستان توں اجازت گھن تے ایندا جواب ݙتا ونڄے ۔ انہاں استدعا کیتی جو ھک موقع ٻیا ݙتا ونڄے ۔ قادر خان مندوخیل آکھیے جو سارے ضلعیں اچ ماڈل کورٹس موجود ہن، میکوں ھک ہفتے دا ویلھا ݙتا ونڄے ساری تفصیل ݙے سڳداں ۔ وزیر مملکت شہادت اعوان آکھیے جو گوگل کرتے تاں میں وی تفصیلات ݙے سڳداں مگر اساں او جواب ݙیوݨ چاہندوں جیڑھا سپریم کورٹ دی طرفوں آسی ۔
