اسلام آباد۔14اگست (اے پی پی):صدرمملکت ڈاکٹر عارف علوی آکھیے جو اللہ تعالیٰ اساݙی قوم کوں ترقی یافتہ ملکاں دی صف اچ کھڑا تھیوݨ دی صلاحیت توں نوازیے، ایندے توں فیدہ چاوݨا چاہیدے ، کوڑیاں خبراں توں بچ تے ملک دی ترقی اچ آپݨا کردار ادا کرو ، اللہ تعالیٰ دا لکھ لکھ شکر اے جیں مسلمانان ہند کوں اوکھ توں کڈھیا تے ھک قوم دے طور تے آزاد وطن اچ جیوݨ دا حق ݙتا ، آزادی ٻہوں وݙی نعمت اے جیں دا اساکوں احساس اے، آزادی کیتے برصغیر دی زمین مسلماناں دے خون توں لال تھی ڳئی ، قیام پاکستان اچ سرسید احمد خان،مسلم لیگ دے پہلے صدر سرشاہ محمد سلطان شاہ، محمد آغا خان،مولانا محمد علی جوہر اتے علامہ محمد اقبال پاکستان دے قیام دی فکری بنیاد پاتی، قائد ملت لیاقت علی خان اتے قائداعظم محمد علی جناحؒ آزادی دے حصول کیتے بھرپور محنت کیتی تے قربانیاں ݙتیاں جیں دا ثمر اے جو اڄ اساں آزاد ملک اچ ساہ گھندے پیوں ۔ صدر مملکت ڈاکٹرعارف علوی ہفتہ 14 اگست 2021 کوں پاکستان دے 75ویں یوم آزادی دے حوالے نال اتھاں ایوان صدر اچ منعقدہ پرچم کشائی دی تقریب توں خطاب کریندے ہوئیں آکھیے جو جے اساں آپݨے ماضی ، حال اتے مستقبل دا جائزہ گھنوں تاں اساݙے پاسے دا پتہ لڳدے ، ماضی اچ اساں تے ترائے جنگاں مسلط کیتیاں ڳئیاں تے خطے اچ اسلحے دے دوڑ جاری اے ، پاکستان کوں اسلحہ دی دوڑ اچ پھسایا ڳیا ، انہاں آکھیے ویلھے دے نال پاکستان زرعی توں صنعتی اتے انفارمیشن ٹیکنالوجی دا ملک بݨدا پئے ۔ صدر مملکت آکھیے جو 1974 اچ جݙاں بھارت ایٹم بم دا دھماکہ کیتا تے صرف 7 سال دے قلیل عرصہ اچ پاکستان اپݨی محنت اتے ذہانت توں اے منزل حاصل کرڳھدی جیڑھا جو ٻہوں وݙی کامیابی اے ، اڄ پاکستان اپݨی ذہانت دی وجہ توں دنیا دے ملکاں اچ اہم مقام رکھیندے ۔
