اسلام آباد۔22مئی (اے پی پی):وزیر اعظم محمد شہباز شریف قدرتی وسائل توں فیدے دی لوڑھ تے زور ݙیندے ہوئیں آکھیے جو ملک دے ٻہوں سارے علاقیں خصوصاً خیبر پختونخوا ، گلگت بلتستان اتے آزاد کشمیر اچ ٻہوں قدرتی وسائل ہن جنہاں توں صحیح طریقے نال فیدہ چاوݨ دی لوڑھ اے ،قیمتی تے نایاب پتھراں دی صنعت دے ودھارے سانڳے ضروری قانون سازی اتےویلیو ایڈیشن دے حوالے نال تربیتی پروگرام شروع کیتے ونڄن ۔ وزیراعظم آفس دے میڈیا ونگ توں جاری بیان موجب اے ڳالھ انہاں آپݨی صدارت اچ پاکستان اچ جیمز اتے قیمتی پتھروں دے شعبے تے اجلاس اچ آکھی اے۔اجلاس اچ وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب ، وفاقی وزیر تجارت جام کمال خان ، وزیر پٹرولیم مصدق ملک ، گورنر سٹیٹ بینک جمیل احمد اتے متعلقہ اعلیٰ سرکاری افسران شرکت کیتی۔انہاں آکھیے قیمتی پتھراں تے انہاں توں تیار تھیوݨ آلی مصنوعات دی بین الاقوامی سرٹیفکیشن تے کم کرݨ تے عالمی نمائشاں اچ پاکستانی نمائندگی یقینی بݨاوݨ دی لوڑھ اے ۔وزیراعظم ہدایت کیتی اے جو جیمز اتے قیمتی پتھراں دے شعبے کوں باقاعدہ صنعت دا درجہ ݙیوݨ سانڳے اقدامات کیتے ونڄن ۔
