اسلام آباد۔10جنوری(اے پی پی) وزیراعظم شہبازشریف اتے سعودی ولی عہد شہزادہ محمد بن سلمان دی ڳالھ مہاڑ رنگ گھن آئی۔ جنیوا دے بعد سعودی عرب توں وی پاکستان کیتے ھک ٻئی وݙی خوشخبری اے۔وزیراعظم شہباز شریف اتے ولی عہد شہزادہ محمد بن سلمان پاکستان اچ سرمایہ کاری 10 ارب ڈالر ودھاوݨ دی ہدایت کرݙتی ۔ سعودی سرکاری اعلان موجب سعوی ولی عہد دا اے اقدام وزیراعظم شہباز شریف نال ڳالھ مہاڑ دے فریم ورک دے تحت تھئے ۔پاکستان اچ 10 ارب ڈالر سرمایہ کاری دا اعلان 25 اگست 2022 کوں تھیا ہئی ۔ سعودی سرکاری اعلان موجب سعودی ولی عہد سٹیٹ بینک آف پاکستان اچ 5 ارب ڈالر دی رقم ودھاوݨ دا جائزہ گھنݨ دی وی ہدایت کرݙتی اے ۔ سٹیٹ بینک آف پاکستان اچ 5 ارب ڈالر ڈیپازٹ اچ توسیع دا اعلان 2 دسمبر 2022 کوں تھیا ہئی ۔ اے اقدامات سعودی عرب دی طرفوں بھرا ملک پاکستان دی معیشت اتے ایندے عوام دی حمایت اچ کیتے ڳئن ۔
