اسلام آباد۔15جولائی(اے پی پی)وزیراعظم شہباز شریف دی اڳواݨی اچ تھیوݨ آلے وفاقی کابینہ دے اجلاس طیبہ گل سکینڈل تے انکوائری کمیشن ٻݨاوݨ، سپریم کورٹ دے فیصلے دے نکات تے عملدرآمد دا فیصلہ کریندے ہوئے آرٹیکل 6 دی کارروائی کیتے کابینہ دی خصوصی کمیٹی ٻݨا ݙتی اے۔ اے ڳآلھ وفاقی وزیر اطلاعات و نشریات مریم اورنگزیب وفاقی کابینہ اجلاس دے فیصلیاں بارے میڈیا بریفنگ اچ آکھی۔ انہاں آکھیا جو طیبہ گل سابق چیئرمین نیب دے خلاف شکایت کیتی ہئی جیندے تے ایکوں 18 ݙینھ اغواء کر تے پی ایم ہائوس اچں رکھیا گئے، پی ٹی آئی حکومت طیبہ گل اسکینڈل تے چیئرمین نیب کوں بلیک میل کیتے ڄݙاں جو کابینہ تحریک عدم اعتماد بارے سپریم کورٹ دے از خود نوٹس کیس دے تفصیلی فیصلے دے نکات تے عمل درآمد، آرٹیکل 6 دی کارروائی سودھا ٻئے اقدامات سانڳے تجاویز ݙیوݨ لو کابینہ دی خصوصی کمیٹی ٻݨائی اے۔ کابینہ سپریم کورٹ دے فیصلے تے اہم قرارداد منظور کیتی، سپریم کورٹ دے فیصلے توں ثابت تھی ڳئے جو سابق حکومت آئین شکنی کیتی، فیصلے سانڳے کابینہ دی خصوصی کمیٹی اپݨی سفارشات ٻݨا تے کابینہ دے آندے اجلاس اچ پیش کریسی۔ کابینہ عالمی منڈی اچ کݨک دی ݙھاندی قیمت دے مطابق 3 ملین ٹن کݨک درآمد کرݨ دی منظوری ݙتی، بندرگاہواں تے لگژری آئٹمز دی درآمد تے پابندی لاوݨ دے ݙو ہفتیاں اچ آوݨ آلی لگژری اشیاء تے پنڄ فیصد اتے ایندے بعد آوݨ آلی اشیاء تے 15 فیصد ڈیوٹی لڳسی۔
