اسلام آباد۔15ستمبر (اے پی پی):وزیر اعظم محمد شہباز شریف شنگھائی تعاون تنظیم دے سربراہانِ مملکت دے سالانہ اجلاس اچ شرکت کیتے ݙو ݙینھ دے دورے تےاسلام آباد توں ازبکستان روانہ تھی ڳئن۔وزیر اعظم آفس دےمیڈیا ونگ توں جاری بیان موجب وزیرِ اعظم سمرقند ایئر پورٹ توں حضرت خضر کمپلیکس ویسن جتھاں او نہ صرف مسیتِ خضر بلکہ اسلام کاریموف دے مزار تے وی ویسن جیں توں بعد وزیرِ اعظم صدر تاجکستان امام علی رحمٰن ،صدر ازبکستان شوکت مرزیوف اتے روسی صدر ولادیمیر پیوٹن نال انڄ انڄ ملاقات کریسن ۔وزیرِ اعظم ایرانی صدر ابراہیم رئیسی، بیلا روس دے صدرالیگزینڈر گریگوریوچ لوکاشینکو اتے صدر کرغستان سیدر جاپاروف نال وی ملاقاتاں کریسن ۔ وزیرِ اعظم ازبک صدر دی طرفوں سربراہانِ ممالک دے اعزاز اچ ݙتے ڳئے عشائیے اچ شرکت کریسن ۔عشائیے دے بعد وزیرِ اعظم ترکیہ دے صدر رجب طیب اردگان نال ملاقات کریسن ۔
