اسلام آباد۔5جون(اے پی پی):وزیر خارجہ بلاول بھٹو زرداری عراق دے ترائے ݙینھ دے سرکاری دورے تے بغداد پڄ ڳئن ۔دفتر خارجہ موجب سنوار کوں عراقی دارالحکومت بغداد پجݨ تے عراقی نائب وزیر خارجہ سودھے ٻئے عراقی حکام، بغداد اچ پاکستان دے سفیر احمد امجد علی اتے سفارت خانے دے سینئر افسران ایئر پورٹ تے وزیر خارجہ بلاول بھٹو زرداری دا پرتپاک استقبال کیتا۔ ݙوہیں ملکاں دے وزرا خارجہ اڄ باضابطہ مذاکرات وی کریسن ۔ وزیر خارجہ بلاول بھٹو زرداری کوں دورے دی دعوت عراق دے نائب وزیراعظم اتے وزیر خارجہ ڈاکٹر فواد حسین ݙتی اے ۔وزیر خارجہ بلاول بھٹو زرداری دورے اچ عراقی قیادت نال ملاقات اچ مشترکہ دلچسپی دے ٻہوں سار امور اتے ݙوطرفہ تعاون ودھاوݨ تے ڳالھ مہاڑ کریسن ۔ وزیر خارجہ بلاول بھٹو زرداری پاکستانی سفارتخانے دے کمپلیکس دا سنگ بنیاد وی رکھیسن۔ وزیر خارجہ دے دورہ عراق دے دوران ݙوہیں ملکاں وچال تعلیم دے شعبے، ثقافتی تعاون اتے ویزا دی سہولت متعلق ٻہوں سارے معاہدیں تے دستخط وی متوقع ہن۔
