اسلام آباد۔16اکتوبر (اے پی پی) وزیراعظم محمدشہبازشریف آکھیا جو عالمی برادری غزہ اچ فوری اتے غیر مشروط جنگ بندی دی آپݨی ذمہ واریاں نبھاوے، مشرق وسطیٰ اچ پائیدار امن کیتے آزاد فلسطینی ریاست ضروری اے۔ پاکستان خطے دی ترقی کیتے آپݨا کردار ادا کریندا رہسی۔ بدھ کوں شنگھائی تعاون تنظیم دے سربراہان حکومت دی کونسل دے 23 ویں اجلاس دی اختتامی نشست اچ خطاب کریندیں ہوئیں وزیراعظم ایس سی او رہنماواں کوں مخاطب کریندیں ہوئیں آکھیا جو ایں موقع تے اساں غزہ اچ اڄوکے جاری نسل کشی کوں نی وسار سڳدے۔ عالمی برادری کوں بربریت روکݨ کیتے اقدامات کرݨے پوسن۔ غزہ اچ جارحیت ہک المیہ اے۔ اتھ فوری اتے غیر مشروط جنگ بندی دی لوڑھ اے۔ وزیراعظم آکھیا جو مشرق وسطیٰ اچ پائیدار امن کیتے آزاد فلسطینی ریاست ٻہوں ضروری اے جئیں دی سرحداں 1967 توں پہلے دی بنیاد تے ہوون اتے جئیں دا دارالحکومت القدس الشریف ہووے۔ وزیراعظم آکھیا جو کونسل دا 23 واں اجلاس کامیابی نال مُک ڳئے جئیں اچ رکن ملکاں آپݨی آوݨ آلی نسلاں دے بہتر اتے پائیدار مستقبل کیتے سانجھے عزم کوں اجاگر کیتے۔ انہاں آکھیا جو اساکوں آپݨے آپسی تعلقات کوں سیاسی اختلافات اتے تقسیم توں انڄ رکھیندیں ہوئیں سانجھے چیلنجز کوں حل کرݨ اتے ہک ݙوجھے دے ہتھ اچ ہتھ ݙے تے آپݨی عوام دے آپسی فیدے، ترقی اتے استحکام کیتے کردار ادا کرݨا پوسی۔ ایں موقع تے وزیراعظم روس دے وزیراعظم میخائل مشوستن کوں کونسل دی چیئرمین شپ سنبھالݨ تے مبارخ ݙتی اتے آکھیا جو پاسکتان ولوں انہاں کوں پورے تعاون دا یقین کرویندوں۔ وزیراعظم شنگھائی تعاون تنظیم دے اجلاس دی کامیابی تے منتظمین کوں مبارخ ݙتی۔
